بقلم: جمال رشاد
بقه سهل أوي تسيئ لسمعة حد توفي من زمان ، ولو حد حيدافع عنه ..هتقول له : هو حضرتك تعرفه أو عشت معاه؟
ده اللي حصل مع مؤلف قصة فيلم ((الست)) واللي المفروض بيحكي حكاية الست ام كلثوم.
انا دخلت اشوف الفيلم حباً في الست ، وحباً في والدي الله يرحمه اللي كان عاشق لفنها.
فلو انت حابب تدخل الفيلم علشان تفتكر أعمال وروائع العظيمة سوما…..فلا اعتقد انك حتخرج مبسوط .
وده اللي حصل للأسف…وخرجت من السينما وانا اشفق علي ذكري الست العظيمة دي من العبث اللي أنا شوفته .
الفيلم فشل بإمتياز في عرض قصة حياتها بشكل مترابط وتصاعدي …قصة حياتها اللي احنا حافظينها من تكرار عرض المسلسل الاذاعي (سوما) واللي قامت بدور سوما فيه السيدة سميحة ايوب ودور ابوها قام بيه الفنان الراحل عبد الوارث عسر .
وكمان المسلسل التليفزيوني ( أم كلثوم ) وقامت بدور سوما فيه صابرين واللي قفلت بعدها الباب في وش أي حد يجرؤ يقوم بتمثيل شخصية الست.
فيلم «الست» فشل في تقديم سيرة أم كلثوم لان القصة والسيناريو اتكتبوا بصورة ضعيفة ركزت علي محطات معينة ومواقف محددة لإنتاج شخصية مُفبركة محاطة بالأزمات الحياتية ، شخصية هشة، ومعقدة.
قصة كتبها مؤلف علي مبدأ ” إطفح و انت ساكت ”
تقريبا هيئة الترفيه أجزلت العطاء فخرج من تحت ايد المؤلف والمخرج هذا العمل الغير فني والغير مترابط.
كل القصص والكتب المعروفة اللي اتكلمت عن سوما حكت أد إيه كان عندها ذكاء اجتماعي، ووطنية ، وخفّة دم ، وسرعة بديهة، لكن للأسف لقينا على الشاشة سيدة حزينة كئيبة، متبلدة، انتهازية، حادة وعنيفة أحيانا ، وتجري وراء المصالح، جريئة في الافصاح عن من تحب من الرجال (الدكتور الحفناوي – خال الملك – رامي) وكأنها قصة لشخص بلا مقومات ولا رؤية يطمع فقط في الشهرة والجاه،
مش عارف ليه المؤلف صمم انه يوصل لنا ان سوما كانت في صراع عائلي كبير مع ابوها واخوها ، وان كل واحد فيهم بيحاول ينصب علي التاني .
لم توفق مني زكي في أداء دور سوما ..كما لم توفق من قبل في تجسيد دور سعاد حسني في فيلم (سندريلا).
شخصية سوما لازم اللي يقوم بيها يغرق فيها ويتقمسها ويعشقها ويذاكرها ويحفظها ، وكمان امكانياته الجسدية والشخصية تكون مناسبة للدور، علشان كده بنقول صابرين تكسب ، ومني زكي تخسر.
لم نري رفاق سوما ، لم نري رياض السنباطي، زكريا أحمد، محمد عبد الوهاب، فريد الأطرش، منيرة المهدية، أبو العلا محمد، بليغ حمدي، وعبد الحليم حافظ ، ظهرت سوما وحدها وكأنها عاشت ونجحت في مشوارها الفني الطويل بشكل منفرد بدون شركاء نجاح وبدون منافسين
أما الزعيم جمال عبد الناصر، فقام بدوره عمرو سعد بأداء باهت بلا هيبة ، وفشل برضه في تجسيد شكل العلاقة بينه وبينه الست ام كلثوم…ماحسينهاش
احنا بننتقد الفيلم مش علشان احنا لجان إلكترونية طالعين نهاجم هيئة الترفيه وصبيانها من الإعلاميين…احنا ناس وطنيين بنعشق بلدنا وبندافع عن رموزها وفنانيها المحترمين اللي شكلوا وجدان اجيال كتير مننا.
سوما هرم مصر الرابع …اتكون لها صورة معينة داخل وجدان كل مصري ولن نسمح لأحد أن يشوهها.
فياريت بقه نشوفكوا وانتو بتصرفوا علي فيلم يحكي حكاية الفنان محمد عبده واصرفوا عينكم عننا.
احنا ناس هنعيش نقاتل علشان تفضل مصر هي هوليود الشرق ومركز الفن والابداع ، ومش هنسمح لأي حد يسحب البساط من تحت رجلينا ويهين تاريخنا الفني أو رموزنا .
بأموالكم….قد تستطيعون شراء منجزات حضارة غيركم ، ولكن لن تستطيعوا صنع حضارة خاصة بكم
أما صاحب عائلة ونيس وسنبل وتخاريف ووجهة نظر ….فلك منا كل التحية والاحترام.
